تبلیغات
چیهال - امیتءَ چہ وتی زھگاں پچ مگراِیں!
چیهال
سبزبات بلوچی باندا نه مروچی


مرتبه
وهد : شنبه 23 خرداد 1394

امیتءَ چہ وتی زھگاں پچ مگراِیں!

 زھگ انسانءِ زندگیءِ پل اِنت. زھگ ھما مزنیں نعمت اِنت کہ پت  و ماتءَ چہ وتی جانءَ ھم دوست تراِنت. زھگءِ دوستی پتءِ گورءَ ھما کساس اِنت کہ پہ آئیءِ ھاترءَ گرمی و سارتی برداشت کنت بلئے نیلیت کہ آئیءِ زھگ دگرانی چمدار ببیت. زھگ ماتءِ دلءِ بنداِنت کہ وتی شیرکنیں وابءَ پہ آئیءَ کربان کنت.

زھگءِ تربیت

ھنچو کہ زھگ سک دوستناک اِنت ھمینچو آئیءِ رودینگ و تربیت کنگ  ھم گران اِنت.

زھگءِ تربیت کنگ چہ آئیءِ لاپ دیگءَ گران تر و سکّ تراِنت. اپسوزی گپ اِشنت کہ ما وتی زھگانی پچ و پوشاک و ورد و وراکءَ باز دلگوش کنیں بلئے پہ آیانی وانینگءَ کمتر پگرمندایں و باز زحمت نکشیں و پدا نالیں کہ مئے چک شیتان اَنت، ھبر نزور اَنت. لوگءِ تہءِ جاور چتور ببیت زھگ ھما وڑءَ ردیت و مزن بیت.

ھمشاں کہ گوش اَنت مئے زھگاں شیتان و کارھراب اَنت اگاں تو اشاں جست بکنئے زھگءِ تربیتءِ واستا تو چنت کتاب ونتگ؟ چنت زانتکارءِ گورءَ شتگئے؟ ادءَ اِنت کہ آیاں چیزے گوشت نکن اَنت.

زھگءَ امیت دیگ

زھگ کہ پیداگ بیت آئیءَ ھچی گون نیست. آئیءِ پہکیں مال و مڈی، امیت اِنت. اگاں ما آئیءِ امیتءَ پہ ڈوک بجنیں گڑا آئی وتی زندگیءِ تہا چہ پہکیں چیزاں زبہر بیت. وتءَ کم لیکیت.

 امیتءِ دژمن

چکءِ ایرجنگ و تحقیر کنگ - کہ بلوچانی تہا باز ھست- امیتءِ مزن تریں دژمن اِنت. ما وتی  زھگانءَ چما گونڈیءَ گوشیں شیتان گڑا رندءَ چتور آ زھگ مردمے بیت؟!

ما چاریں کہ مئے زھگ کجا کارے ھراب کنت تاں کہ آئیءَ مان بترینیں و دستے گرم بکنیں بلئے اگاں ھزار وشیں کار بکنت یکے ھم مئے چمءِ دیمءَ نیئیت. اشی زھگءِ امیتءَ کشیت. زھگ ھنچو سمجیت کہ من بدیں مردمے آں، من شر نباں و تا زندءِ گڈی دمانءَ ھمے ھیال آئیءِ وجودءِ توکا پشت کپیت. نئے پہ وت کسے بیت و نئے پت و ماتءِ دردءَ وارت.

زھگءِ دیمرویءِ دوئیں بالاں

امیت دیگ و شاباش کنگ دوبال اَنت کہ زھگ گوں آیاں دیمرویءِ آزمانءَ بال کنت گڑا اے دوئیں بالاں مپروشیں.

امیت، زھگءِ چمانی روک اِنت گڑا آئیءِ چمانی روکءَ کور مکنیں.

محمد آسکانی/ پہرہ

13 جون 2015

 




بُن گپ: نبشتانك،  زهگانی تربیت، 
ٹَـپـّه یاں : تربیت فرزندان، تشویق، بلوچی مطلب، ادبیات بلوچی، بلوچی ادب، بلوچستان، بلوچ زهگ،
دیم دیوک: muhammad askani
گڈسری نبشتانکاں
نبشتانکانی لڑ
همُک روچی لینک
دگه ساماں
من کلوبءِ تها

قالب وبلاگ