تبلیغات
چیهال - دنیاءِ دوست‌داروكان و آخرتءِ واهَگ‌داراں
چیهال
سبزبات بلوچی باندا نه مروچی


مرتبه
وهد : پنجشنبه 21 خرداد 1394

دنیاءِ دوست‌داروكان و آخرتءِ واهَگ‌داراں

دنیاءِ دوستی و آهیر بَیَگ په آئیءِ حاصل كنگءَ، عالم و زانتكارانی دیمءَ پولنگ كنت و آیانی بیمءَ گار كنت. إے پیمیں عالمانی علم په مردماں سودمند و پركَٹ إنت، بلئے آیاں وت چه وتی علمءَ بهرے نبرأنت. إشی زانتگیں گپے كه إے عالماں، شرعءِ چراگءَ دستءَ كتگ و كرّ و گورءَ روشنی تالاں كن أنت، بلئے نباید آیانی دل په إشیءَ وش ببیت؛‌ پچے كه برے برے الله تعالی په وتی دینءِ دیمابرگءَ چه بدكاریں مردماں هم كار گیرت. هما پیمءَ كه پیگمبر صلی الله علیه و سلمءِ پرمائش إنت: «إن الله لیؤید هذا الدین بالرجل الفاجر»؛ الله تعالی، وتی دینءَ گوں بدكاریں مردءَ هم دیما بارت.

علم په بدیں عالماں حجتے

إے پیمیں عالماں باكس و كبریتءِ وڑءَ أنت كه 

هر كس چه آئیءِ آسءَ بهرزوریت بلے آئیءِ جرند هچ پیمیں بهرے نبارت. دنیادوستیں عالماں هم همے پیمءَ أنت؛ مردماں چه آیانی زانت و علمءَ كٹ و سوب گرأنت، بلے آیاں وت چه وتی علمءَ بےبهرأنت. إے پیمیں علم آیانءَ زیان دنت و په آیاں حجتے بیت: «إن اشد الناس عذاباً یوم القیمه عالم لم یَنفعه اللهُ بعلمه»؛ قیامتءِ روچءَ، سكتریں عذاب هما عالم‌ئیگ إنت كه چه وتی علمءَ هچ فایده‌ئی نبرتگ.

آ علمے كه اللهءِ گورءَ باز كیمتی إنت، بلے اللهءِ گهتریں مخلوق آئیءِ قدرءَ مزانت و آئیءَ په پست و مقامءِ كٹگءَ و دنیاءِ درگیجگءَ ازبابے بكنت، بے شك وتی صاحبءَ زیان دنت.

اللهءِ كیمتی‌ئیں چیزءَ ناكدری كنگ و دنیا كه اللهءِ گورءَ ارزشے نیستی آئیءَ كیمتی كنگ، سكه اللهءِ گورءَ ارزشے نیستی آئیءَ كیمتی كنگ، سكیں ردے كارے و گوں اللهءَ معارضه كنگ إنت.

وانینگ و تدریس و فتوادیگ هما وهدءَ په عالمءَ سودمند بیت كه بس اللهءِ هاترءَ ببیت و چه پست و مقامءِ كٹگ و دنیاءِ‌رندءَ كپگءَ هالی ببیت. علمءِ تها اخلاصءِ نشانی إشنت كه عالم چه دنیاءَ بے رغبت ببیت.

آ عالمانے كه دنیاءِ دامءِ تها كپتگ أنت، چه دنیایی عالماں شمار كنگ بنت. إشاں وتءَ مردمانی دینی پیشوك و رهشون و زمینءِ گهتریں مردم زان أنت هالانكه بدیں عالم و مردمان و دینءِ راه‌بنداں (راهزناں) همیشان أنت هنچو كه إے آیتءِ تها آتكگ:

وَیَحْسَبُونَ أَنَّهُمْ عَلَى شَیْءٍ أَلَا إِنَّهُمْ هُمُ الْكَاذِبُونَ اسْتَحْوَذَ عَلَیْهِمُ الشَّیْطَانُ فَأَنسَاهُمْ ذِكْرَ اللَّهِ أُوْلَئِكَ حِزْبُ الشَّیْطَانِ أَلَا إِنَّ حِزْبَ الشَّیْطَانِ هُمُ الْخَاسِرُونَ [مجادله: 18- 19]؛ و گمان كن أنت كه آ شریں راهےءِ سرءَ أنت. خبردار ببے إت شما كه همش أنت دروگبند. كپتگ إشانی چَكّءَ شیطان شموشائینتگ أنتی اللهءِ ذكر، إے شیطانءِ جماعت أنت، سهیگ ببے إت شما كه شیطانءِ‌جماعت تاوان بارأنت و بس.

 

بدیں عالماں شیطانءِ جانشیناں

یك بزرگے شیطانءَ دیت كه مهلوكءِ گمراه كنگی انگار كتگ و یك كنڈے په دلجمی نشتگ! بزرگءَ إے كارءِ سَوَبءَ چه شیطانءَ جست كت. ابلیسءَ گوشت: إے زمانگءِ بدیں عالماں په یك واهگے منی كارءَ انجام دیگءَ أنت و منی دل إش جم كتگ.

جی هو، إے زمانگءِ توكا دینءِ‌ تها هر پیمیں سستی كه گندگ بیگءَ إنت پهكاں چه بدیں عالمانی شومیءَ و آیانی هرابیں نیتان أنت.

آخرتءِ عالماں

آ عالمانے كه دنیاءِ دوستی إش دلءِ تها جاگه نداتگ و جاه و مقامءِ رندءَ نه أنت، إے عالماں چه آخرتءِ عالماں و پیگمبرانی میراث‌دار شمار كنگ بنت. گهتریں مردماں همیشان أنت و إشانی نَدءِ سیاهی و جوهرءَ گوں شهیدانی هونءَ وزن كن بنت كه عالمانی نیمگ گران‌تر بیت. و « نوم العلماء عبادة » إشانی بارهءَ گوشگ بوتگ؛ هانیں عالمانی واب هم عبادت شمار كنگ بیت.

همیشان أنت كه آخرت إش پسند كتگ و دنیاءِ بدی و گندگی په آیاں ثابت بوتگ. په ابدمانیں زندءَ جهد كن أنت و ناپاداریں دنیاءِ دوستی إش چه دلءَ دركتگ.

دنیا و آخرت دو هپوكءِ پیمءَ أنت؛ گوں یكےءِ‌ راضی كنگءَ، آ دگه ناراض و دلگران بیت.

اگاں دنیا دوستناك إنت گڑا آخرت نادوست إنت و اگر دنیا نادوست إنت گڑا آخرت دوستناك إنت. إے دوئیناں جمع كنگ دو ضدءِ میانءَ جمع كنگءِ پیمءَ إنت. « ما أحسن الدین و الدنیا لو اجتمعا »؛ چینچو وش أت كه دین و دنیا یكجاه جمع ببوتین أنت، بلئے چوش بیت نكنت.

یك شبهه‌إےءِ جواب

البت یك گروهے چه مشایخ كه لهتے مصلحتانی سوبءَ ظاهرإش چو كه دنیاداران إنت و گوشئیگا په دنیاءَ دوستی إش هست بلئے حقیقتا هچ دوستی و تعلقے گوں دنیاإش نیست. رِجَالٌ لَّا تُلْهِیهِمْ تِجَارَةٌ وَلَا بَیْعٌ عَن ذِكْرِ اللَّهِ [نور: 37]؛ هنچیں بندگ أنت كه كه نے سوداگری نادلگوش كنت آیانءَ و نے دئے و گِر چه اللهءِ‌یادءَ.

واجه نقشبند گوشیت: بازارءَ سوداگرے دیت اوں كه 50 هزار دینار كم و گیش سودائی كت، بلئے یك دمانے هم چه اللهءَ ناهیال نبوت.

ندكار: مجدد الف ثانی، شیخ احمد سرهندی

 رجانكار: محمد آسكانی

·    دلگوش! إے نبشتانك چه مكتوبات امام ربانیءَ رجانك كنگ بوتگ و په آیتانی رجانكءَ مولانا عبدالغنی افشانیءِ ترجمه گچیں كنگ بوتگ.




بُن گپ: نبشتانك، 
ٹَـپـّه یاں : ادبیات بلوچی، بلوچی ادب، رجانك، شیخ سرهندی، مكتوبات ربانی، بلوچستان، بلوچ،
دیم دیوک: muhammad askani
گڈسری نبشتانکاں
نبشتانکانی لڑ
همُک روچی لینک
دگه ساماں
من کلوبءِ تها

قالب وبلاگ