تبلیغات
چیهال - چمشانكے شهید مولانا احمد ناروییءِ زندءِ سرءَ
چیهال
سبزبات بلوچی باندا نه مروچی


مرتبه
وهد : دوشنبه 17 فروردین 1394

الله تعالی مدام په وتی سرجمیں دینءِ دیمروی و یاریءَ، دینی زانتكار و عالم پیداگ كنت. آیانءَ په وتی دینءِ هزمت كنگءَ رهشونی كنت و آیانی عمر و وهدءِ توكا بركت عطا كنت. یكے چه إے ڈولیں شهزانتیں عالماں، ایرانءِ اهل‌سنت دوزواه و شیخ الاسلام مولانا عبدالحمیدءِ راستی باسك، مولانا احمد نارویی إنت. إے واجه ماں وتی كمّیں بلے پربركتیں عمرءَ په اسلام و مسلماناں هاسكار په بلوچستان و ایرانءِ اهل‌سنتءَ باز هزمت كرت.

پیدائش

واجه مولانا احمد نارویی، سال 1342هـ . ش ماں روایرشتی بلوچستانءِ زاهدانءِ شهرءَ پیداگ بوت. واجهءِ آریپیں پتءِ‌ نام عبدالكریم إنت.

وانگءِ بنگیج كنگ

واجهءَ بنگیجی وانگاں ماں دارالعلوم زاهدانءَ وانت و آسر كت أنت. ماں إے دینی وانگجاهءَ چه مولانا عبدالعزیز ملازاده، مفتی خدانظر و شیخ الاسلام مولانا عبدالحمیدءِ محضرءَ كٹّ و سوبی گپت.

وانگءِ رندگیری

واجهءِ علمی هینّاری انگتءَ نپرشتگ أت، گڑا په وتی زانت و علمءِ گیش كنگءَ پاكستانءَ شت و چه آ ملكءِ عالم و زانتكاراں بهری زرت و آسرءَ جامعه فاروقیهءَ مان بوت و وتی وانگی دربرت. واجهءَ پاكستانءِ تها چه مولانا عبدالغنی جاجروی و شیخ سلیم الله خان و إے دگه عالمانی زانت و علمءَ بهر زرت.

پچ‌ترّگ په وطنءَ

واجه رند چه وانگءِ دربرگءَ وتی ملكءَ آتك و اولسرءَ ماں زاهدانءِ قاسم العلومءِ دینی وانگجاهءَ په وانینگءَ گلائیش بوت. چار سالءَ ماں مدرسهءَ گوں تدریس و دینءِ هزمتءَ گوازینتی.

ماں سال 1367 هـ .شءَ شیخ الاسلام مولانا عبدالحمیدءِ لوٹگءِ پدءَ، مولانا احمد دارالعلوم زاهدانءَ شت و تاں وتی زندءِ گڈی دماناں په دینی علومءِ واهگدارانی تعلیم و تربیتءَ گلائیش بوت.

وفات

مولانا احمد رحمة الله علیه رند چه چنت سال هزمت په اسلام و مسلماناں هاسكار په بلوچ‌راجءَ، ماں 50 سالگیءَ ماں یك راهی حادثه‌إے په اللهءِ دیدارءَ شت و چه إے كوڑئیں دنیاءِ رنج و گماں راحت بوت بلے رند چه وتءَ یك جهانے برّ و ابیتكی كت.

واجهءِ لهتے نیكیں صفات و رپتاراں

مولانا احمد یك جامعیں شخصے أت، بچكندگ چه آئیءِ دپءَ هچ دور نبوت، دیم‌تهاریں مردمے نه أت، په مردمانی جیڑه‌یانی گیشینگءَ زبردستیں عالمے أت. ماں تدریس و درسءِ سمجینگءَ اللهءَ هاسیں توانایی‌إے بكشتگ أت. چه وتی چاگردءِ هال و جاوراں شر سهیگ أت و په بلوچستان و دارالعلوم زاهدان و ایرانءِ اهل‌سنتءِ مشكلانی گیشینگءَ تیارأت كه په إے هاترءَ دو رندءَ زندانءَ شت. میانه‌رویءِ كشكءِ سرءَ روان أت.

وتی گرانبهائیں وهدئے په اسلام و مسلمانانی هزمتءَ ندر كتگ أت. الله تعالی واجهءَ ماں وتی گلباگءِ برزیں ماڑیاں جاگه بدیات. هنچو بات

محمد آسكانی

سرچمگ: سنی آن‌لاینءِ سایت




بُن گپ: بلوچانی زانتكار،عالمءُ بهادران، 
ٹَـپـّه یاں : مولانا احمد نارویی، مسجد مكی، مطالب بلوچی، دارالعلوم زاهدان، وفات مولانا احمد نارویی، علمای اهل سنت، علمای بلوچ،
دیم دیوک: muhammad askani
گڈسری نبشتانکاں
نبشتانکانی لڑ
همُک روچی لینک
دگه ساماں
من کلوبءِ تها

قالب وبلاگ