تبلیغات
چیهال - بلوچستانءِ مزنْ مجاهد، علامه محمد ابراهیم دامنی(رحمه الله)
چیهال
سبزبات بلوچی باندا نه مروچی


بلوچستانءِ مزنْ مجاهد، علامه محمد ابراهیم دامنی(رحمه الله)          

گِرّ کنت وهدے دل که نادانیں / مهنتاں زندے گیش کنت گرانـیں

دریگتیں بیَـتکین أنت پدءَ پیشی / وژدلیں بــاریـگ وش و شـادانـیں

پاس کنت هنچو دل شپے پاساں / تو گـوشئے زاناں تـبلے حــیوانـیں

بیا که بندیگاں تــئی زهــیرانـی/ آتکگ أنت موسم سارت و ساچانیں

چیزے گپ واجهءِ خانوادهءِ بابتءَ

علامه محمد ابراهیم دامنی - رحمةالله علیه -  ماں یک دینداریں خانواده اے که وتی زندءَ په کشاورزیءَ گوازینگءَأت چم پچ کت. الله پاکءَ واجهءِ خانواده بازجاگاهءَ چکاس إتگت؛ بلے چه إے درستاں کامیاب درآتکگ أت. إشاں یک جنیں چوکے و یک مردیں چوکے و چه دست داتگ أت؛ بلے صبر و اوپارإش کتگ أت. اناگتءَ یک نیکیں بنده إے آیانءَ بشارت دنت که خدا آیانی چماں گوں یک صالحیں چوکےءَ سارت کنت و مَرهمے په آیانی درداں بیت و یک وِردے سوج دنت إش و گوشیت: مدام بوان إتی.

پیدائش

علامه محمد ابراهیم دامنی، سال 1329هـ .شءَ پیداگ بوت. مات و پتءَ آئیءِنام، ابراهیم إیرکت تا که چو مهتر ابراهیم خلیل اللهءِ وڑءَ حقْ دوست و حق گْوشے ببیت.

وانگءِ بنگیج کنگ

واجهءَ گونڈیءِ زمانگءَ چه إے دگه چوکاں باز فرق هست أت. لیب و گوازی وجنگ و مردمانی دلسیاه کنگءِ جاگاهءَ مکتبءَ روت و بغدادی قاعدهءَ مسجدءِ پیش نماز، سید نجم الدینءِ گورءَ وانیت و رندءَ قران شریفءَ سِی روچءِ توکا سِکّیت.

درکپگ په وانگءِ رندگیریءَ

واجه په وانگءِ خاطرءَ دیم په هندءِ سِیمسری(مرزی)شهر، «جمیس آباد»ءَ شت. اول سرءَ جمیس آبادءِ کَلّگےءَ شت و «مالابد» و پارسی ادبی كتابانی وانت.

آدگه سالءَ جمیس آبادءِ شهرءَ شت و چه مولوی فیض محمدءَ کٹ و سوبی گپت.

دارالعلومءِ اشرف آبادَ روگ و وانگءِ دربرگ

واجهءِ علمی هیناری انگتءَ نپُرشت؛ گڑا ماں آ زمانگءِ مشهوریں وانگجاه، دارالعلوم اشرف آبادءِ تندواله یارءَ شت و پانگءِ شهزانت و مجاهدانے چوشکه مولانا ظفراحمدعثمانی، مولانا جمشید، مولانا احتشام الحق تهانوی و إے دگه واجهاں  شاگردیءِ زانی جت.

مولانا دامنیءَ مشکوة المصابیح و صحیح بخاری علامه ظفراحمدعثمانیءِ گورءَ وانت و آسرکت أنت و سنن ترمذیءَ مولانا محمد مالک کاندهلویءِ گورءَ وانت.

واجهءَ قرآن شریفءِ تفسیرءِ دوماهی دورهءَ بهرزرت و چه مزنْ مفسر، مولانا عبدالغنی جاجرویءَ کٹ و سوبی گپت. مولانا دامنی همے دوماهی دوره تفسیرءِ بابتءَ پرمائینیت: اگاں منی وانگءِ سرجمیں سالاں یک نیمگے و إے دوره یک نیمگے ببیت، إے دورهءِ ارزش انگتءَ گیشترإنت؛ پچے که إے دورهءَ بازیں پُرکَـٹّیں برورد و ثمر په مولانا دامنیءَ گون أت. واجهءَ قرآنءِ علمی مضامینءُ مناظرهءِ روش، همے دورهءَ پکّا یاد گپت و إے پَــڑءِ شهسوار بوت.

مولانا دامنی ماں هژده سالگیءَ چه شرعی علومءِ وانگءَ فارغ بوت و ماں سرجمیں شرعی علومءَ زبردست و استاد ترّإت.

پچترّگ په وطنءَ

مولانا دامنی رند چه وانگءِ دربرگءَ پلیں بلوچستانءَ آتک و مولانا عبدالله روانبدءِ وانگجاهءَ شت و هپت سالءَ پریں په طالب و نودربرانی وانینگ(تدریس)ءَ گلائیش بوت و رندءَ دیم په پهره(ایرانشهر)ءَ شت.

ایرانشهر، واجهءِ کار و فعالیتءِ بُنجاه

واجه رند چه ایرانشهرءِ امام جمعهءِ لوٹگءَ، ایرانشهرءَ شت و ماں حوزه علمیه شمس العلومءَ په وانینگءَ گلائیش بوت. همے پیمءَ ماں دولتی وانگجاه و دبیرستاناں، عربی درسانی وانینگءِ ذمه داربوت.

مسجدمکیءِ بندگ ماں ایرانشهرءَ

وهدے كه واجه شمس العلومءَ تدریس كنگءَ أت، یک روچے په ایرانشهرءِ مسجدمکیءِ قبلهءِ تعیین کنگءَ لوٹائینگ بیت. رند چه قبلهءِ تعیین کنگءَ آ محلهءِ مردم چه واجهءَ دزبندی کن أنت که مسجدءِ امام ببیت؛ گڑا واجه إے مسجدءِ امامتءَ قبول کنت. باز دیر نگوست که مسجد مکی، واجهءِ فعالیتانی بُنجاه بوت و ورنا و نوکْ ورنا و وانوگراں رمب رمبءَ أوداں مان شانت.

چیزے مدتءَ رند، واجهءَ شمس العلومءَ انگاركت و حقانیهءِ وانگجاهءَ شت؛ بلے واجهءِ فعالیتانی تهءَ هچ وڑیں سستی و نزوری إے نیاتک. گوں واجهءِ روگ په حقانیهءَ، إے وانگجاه گیش چه پیشءَ دیمروی کت.

ماں همے زمانگءَ یک جمعیتے گوں مولانا محمد عمر سربازیءِ سروکیءَ بنگیج بوت که مولانا دامنی یکے چه آئیءِ اصلی باسکان أت و جمعیتءِ مجلهءِ شونکاری(تهیه و تنظیم) واجهءِ سرءَ أت. گوں اینچو پُرکاریءَ واجهءَ گیش چه چار ساعتءَ، واب نیست أت.

ماں واز و نصیحتءِ میدانءَ

واجهءَ په طالب و نودربران و زهگانی پنت دیگ، نصیحت، ارشادءُ تربیتءِ اصولءَ باز سرپدی و زانتكاری هست أت و زانتی که چه کجا بنگیج بکنت و کجا بهلّینیت.

ماں بحث و مناظرهءِ میدانءَ

واجهءَ ماں بحثءُ مناظرهءَ مزنیں بهرے گون أت. سرجمیں بحثانی گوں آیات و احادیث و عقلی دلایلءَ هوارإتنت و برے برے ماں تنز و گوشکندءِ قالبءَ إتنت.

واجهءَ په وتی عقیده و سَسّاءِ درشاں کنگ و دیمپانی کنگ چه اسلامی مقدساتءَ چه هچ کسےءَ  ترسے نیست أت و ماں إے راهءَ گیش چه ده سال چه وتی پربرکتیں عمرءَ ماں زندانءَ گوازینت و الله تعالیءِ پاکوانگی، قرآن شریفی ماں زندانءَ حفظ کت.

واجهءِ تالیف و ترجمه یاں

واجهءَ ماں نبیسگ و ترجمهءَ مزنے بهرے زرتگ أت و بازیں پرکٹین و پربهائیں کتاب په اهلسنت و وتی راجءَ پیشی کتگ.

واجهءِ تالیف كتگیں كتاب

1- آداب زندگی 2- استعمال ومعامله مواد مخدر 3- رباعیات دامنی 4- دستورآسان(إے كتاب، عربی زبانءِ بن رهبندءِ بابتءَ إنتءُ ماں اهلسنتءِ وانگجاهاں وانینگءَ بیت) 5- آیات منتخبات(إے كتاب، عقیدهءِ بارهءَ إنت و ماں اهلسنتءِ وانگجاهاں وانینگءَ بیت) 6- تحول فرهنگ 7- عقیده یانی کتاب(إے كتاب بلوچی إے) 8- نمازی کتاب(إشی هں بلوچی إے).

واجهءِ ترجمه كتگیں كتاباں

1- حضرت معاویه وحقایق تاریخی 2- تاریخ دعوت واصلاح، یکمی، دومیءُ پنچمی جلد 3- ازدواج اسلامی 4- حیات المسلمین 5- مناجات مقبول 6- ذکری ها را بشناسید 7- نسیم ایمان 8- ارشادالرشید 9- برداشتی از سوره کهف 10- تیسیرالادب ماں دو جلدءَ.

وفات

واجه ماں سال 1379هـ .شءَ چه زندانءَ آزات بوت. گوں واجهءِ آزاتیءَ، اهلسنت و بلوچْ راج باز وشحال بوت أنت که پدءَ واجه آیانی پانگءَ کئیت و آیانی تهارْ ماهین و زرُمبیں شپانی، چاردهی ماه بیت؛ بلے إے وشحالی دیرنداشت و گوں واجهءِ بیراں بوگءَ آسربوت.

واجه - رحمةالله علیه - ءَ ماں یک راهی حادثه إے، ایرانشهر و سربازءِ راهءَ ماں 25/4/1380هـ .شءَ إے کوڑه إیں دنیا یله دات و په وتی محبوبءِ دیدارءَ شت.

    چه واجهءِ روگءَ اهلسنت و بلوچْ راج باز دلپدرد و گمیگ بوت أنت و ماتیں بلوچستاں پدءَ ماں وتی یک دگه مزاریءِ سوگءَ نشت و بَـــرّ و أبیتک بوت. 

    خداءِ رحمت مدام آئیءِ سرءَ ساچان بات أنت.آمین

سرچمگ: ندای اسلام، هفتمی نمبر

            ندکار: محمد آسكانی




بُن گپ: بلوچانی زانتكار،عالمءُ بهادران، 
ٹَـپـّه یاں : زندگی نامه مولانا ابراهیم دامنی، علمای بلوچ، مشاهیر بلوچ، بلوچی نبشتانک، زبان بلوچی، بلوچی وبتاک، بلوچ شخصیات،
دیم دیوک: muhammad askani
گڈسری نبشتانکاں
نبشتانکانی لڑ
همُک روچی لینک
دگه ساماں
من کلوبءِ تها

قالب وبلاگ