تبلیغات
چیهال - دومی خلیفه، حضرت عمر فاروق- رضی الله عنه -
چیهال
سبزبات بلوچی باندا نه مروچی


مرتبه
وهد : پنجشنبه 21 فروردین 1393

دومی خلیفه، حضرت عمر   فاروق- رضی الله عنه -

بے شك ایمانءِ بهتریں سرچمگ، پیغمبر وآئیءِ صحابیانی زندگی وتاریخ إنت. صحابه تاریخءِ هما مزن مردان أنت كه وهدے اسلامءِ دعوت په آیاں رس إت آیاں گوں جان ودلءَ قبولش كت وگوشتش: رَّبَّنَا إِنَّنَا سَمِعْنَا مُنَادِیًا یُنَادِی لِلإِیمَانِ أَنْ آمِنُواْ بِرَبِّكُمْ فَآمَنَّا.

آیاں گوں وتی زحمت و خدمتاں په اللهءِ دینءَ، وتی نام إش ماں تاریخءِ دپترءَ ثبت كت و په همیشه آیانی نام وتوار پشت كپت.

ماں إے نبشتانكءَ یك گُلے چه إے گلستانءَ كه آ حضرت عمر فاروق إنت پیش كنگ بیت

واجهءِ نام و نسب

حضرت عمربن خطاب بن نفیل بن عبدالعزی عدوی وقرشی إنت و واجهءِ نسب ماں كعب بن لؤی ءَ گوں پیغمبرءِ نسبءَ هور بیت. واجهءِ لقب، فاروق إنت.

پیسر چه اسلام

كسانیءَ حضرت عمر وتی پت وناكوانی شپانك أت، رندءَ ماں ورنائیءَ گوں وتی براتءِ همكوپگیءَ په تجارتءَ شت وماں وتی سوداگری سفراں په شام ویمنءَ گوں إے دگه راجانی دود وربیدگءَ پجاروك بیت. وماں جاهلیتءَ قریشءِ سفیر أت و وهدےكه اسلام آتك آئیءِ وفا گوں قریشءَ سبب بیت كه گوں اسلامءَ مخالفت بكنت همے پیمءَ انگتءَ آئیءَ اسلام ءِ بارهءَ باز سرپدی نیست أت؛ همے واستا آئی په كسانے كه ایمانش آرتگ أت باز ترند سك أت.

اسلام آرگ

وهدے كه اسلامءِ توار روچ په روچ ماں مكهءَ برزتر روان أت ومكهءِ مشركاں  دیت كه هچ پیمءَ محمد چه وتی دعوتءَ دست بردار نه إنت، گڑا آیاں تصمیم گپت كه واجه پیغمبرءَ چه بین ببرأنت، بلے هركسءَ توان نیست أت كه إے كارءَ بكنت، پمشكا پهكاں یك توار بوت أنت كه عمر باید إے كارءَ بكنت، گڑا عمر تیار بیت كه پیغمبرءَ چه بین ببارت، بلے الله تعالیءِ تقدیر دگه پیمے أت.

عمرءَ زهم زرت و دیم په ارقم بن أبی الأرقمءِ لوگءَ رهادگ بیت، اناگتءَ راهءِ تها گوں نعیم بن عبدالله ڈیكی وارت آئیءَ گوشت: هاں عمر! باریں كجا جهلادئے؟ عمرءَ پسّه دات كه په محمدءِ كشگءَ رهادگوں، نعیمءَ گوشت: اوْ عمر! ترا گوں محمدءَ چكارإنت، برو وتی گهار و زاماتءَ بچار كه آ مسلمان بوتگ أنت.

وهدے كه عمرءَ إے خبر إشكت اجكّه بوت و په وتی گهارءِ لوگءِ نیمگءَ تچان بوت، بزان إے وهدی حضرت خباب، آئیءِ زامات و گهارءَ سورهءِ طهءَ درس دیگا أت، وهدے كه آیاں عمرءِ پادءِ برمش إشكت، حضرت خباب إش چیر دات و وت یك گورے نشت أنت، عمرءَ بزاں آیانی توار إشكتگ أت، گوں هژم وغضبءَ لوگءَ مان بوت و گوشتی: شما گوں وت چے وانگءَ إتت؟ آیاں گوشت: هچی ما بس گوں وتءَ هبر كنگاإتیں. عمرءَگوشت: شما بے دین بوتگ إت؟آیان گوشت: اگاں حق غیر چه تئی دینءَ ببیت گڑا پدا هں ما را بی دین گوشئے؟ عمرءَ گوں إے خبرءِ إشكنگءَ وتی زاماتی ماں زمینءَ جت وآئیءِ سینگءِ سرا نشت و په آئیءِ جنگ و چوپگءَ لگّ إت، عمرءِ گهار په وتی لوگواجهءِ كمكءَ شت ولوٹتی كه عمرءَ چه آئیءِ سرءَ دور بكنت كه عمرءَ شهمات كت وچه آئیءِ دیمءَ خون رچگءَ لگ إت آئیءِ گهارءَ گوشت: اے خداءِ دژمن تو مارا په إشیءَ جنئے كه یكیں خداءَ عبادت كنیں؟ هركارے لوٹئے بكن كه ما مسلمان بوتگ إیں. عمر گوں إے گپانی إشكنگءَ آرامتربیت و چه زاماتءِ سینگءَ پاد آتك وگوشتی: همے صحیفهءَ كه شمائی وانگاإتت منی بدیت تا بوانانی، بلے گهارءَ نمنّ إت وگوشتی: تو پلیتئے باید غسل بكنئے. عمرءَ إے كار كت  وگهارءَ  سوره طه ءِ آیات آئیءِ دستءَ دات، سوره طهءِ وانگءَ مزنیں تأثیرے آئیءِ سرا هشت وتی گهاری گوشت: هما ذات كه إے گپانی جتگ، بس عبادتءِ لایق إنت، منءَ محمدءِگورءَ ببر إت. عمر رسول اللهءِ گورءَ ماں أرقم بن أبی الأرقمءِ لوگءَ شت و اسلامی آرت. گوں عمرءِ اسلام آرگءَ مسلمانانی حالت باز تغییر كت ومسلماناں توانت ماں مسجدالحرام، پهكانی دیمءَ نماز بوان أنت وعمرءَ گوشت: رند چه مروچی هچبر خداءَ چیركانی عبادت نكنیں. عمرءَ گوں وتی إے توارءَ تاریخءِ سكوتی پروشت و آشیر مردءَ تهنا ابوجهل وابو لهب خطاب نكت أنت بلكیں آئیءِ مخاطب پهكیں زوراكاں ماں پهكیں زمانگان أنت.

هجرت

وهدے كه پیغمبرءَ مسلمانانی په هجرتءَ دستور دات، مسلماناں رُمب رمبءَ چیركانی هجرت إش كت، بلے عمر بے هچ بیمے په هجرتءَ آماده بوت و وتی زهمی لانكءَ جت زرت و ماں روشنیں روچءَ مسجد الحرامءَ آتك و رند چه طوافءَ  پهكیں كافرانی خطاب كت وگوشتی: شما پهكاں سهیگ ببئیت كه من دیم په مدینهءَ روگایاں هركس كه لوٹیت چكانی چوره، جنی جنوزام وآئیءِ پت ومات پرسیگ ببنت  گڑا بیئیت ڈن چه شهرءَ گوں من دیم په دیم ببیت، بلے هچكسءَ إے جرأت نیست أت كه گوں عمرءَ بمڑیت.

حضرت عمر وپیغمبرءِ وفات

وهدے كه پیغمبر چه دنیا رخصت بیت، صحابه پهك حبران بوت أنت وجهان آیانی چمانی دیمءَ تهار بوت وگوں وت إش گوشت: كاش كه پیسر چه إشیءَ ما بمرتین إیں، عمر هں ماں سكیں غم واندوهے تها أت وپیغمبرءِ دوستی، آئیءِ سرا غالب أت وپیغمبر وفاتی نمن إت، بلكیں زهمی دستءَ گپت ودیم په مردمانی كت وگوشتی:  پیغمبر وفات نبیتگ، بلكیں موسیءِ وڑءَ خداءِ نیمگءَ شتگ و پدا پچ تریت وهركس كه بگوشیت: پیغمبر وفات بوتگ. من آئیءِ سرا سنداں.

همے وهدءَ صدیق اكبر آتك ومردمانی دلگوشی وتی نیمگءَ كت وپرمائینتی: أے مردم! هركسءَ كه محمدی عبادت كتگ المءَ بزانت كه واجه وفات بیتگ، وهركسءَ كه الله عبادت كتگ، گڑا الله زندگ إنت وهچبر نمریت. عمر گوں إے گپانی إشكنگءَ سارءَ آتك و زانتی كه آئیءَ اشتباه پهمتگ ودلجم بوت كه پدءَ وتی محبوبءَ دنیاءِ سرءَ نگندیت.

حضرت عمر ماں حضرت ابوبكرءِ‌ خلافتءَ

رند چه إشیءَ كه حضرت ابوبكر په خلافتءَ گچین كنگ بیت، حضرت عمر آئیءِ باسك أت و گوں وتی شور و سر سوجاں په اسلام ومسلماناں خدمتی كت.

حضرت عمرءِ خلافت

وهدے كه حضرت ابوبكرصدیقءَ معلوم بیت كه آئیءِ وفات نزیك إنت، گوں اصحابءِ شورءَحضرت عمر فاروقی  په خلافتءَ گچین كت، چه إے كارءَ بازیں مردمے گوشیگا دلگران أت وگوشت إش كه حضرت عمر گرمْ مغز و جلالی مردے، بلے حضرت عمر رند چه حضرت ابوبكر صدیقءِ دفن كنگءَمسجدءَ آتك و وتی  روش ومنهجی په مردماں توضیح دات وپرمائینتی:  أے مردم!  لهتے چه شما چه منی  خلافتءَ دلگران إتت وشمارا إے بیم هست أت كه عمر شمئے سرا سكی كنت، بلے إشیءَ بزان إت كه منی سكی پیغمبر و ابوبكرءِ زمانگءَ بیتگ، پچے كه پیغمبر رحمة للعالمین وابوبكر سكیں نرمْ دلے بیتگ، آیانی نرمی گوں منی سكیءَ یك معتدلیں حالتے پیداگ كتگ، بلے هنو منی سكی بس ظالمانی سرا إنت،  و من په مومناں چه آیانی  جرندءَ نرم تراں. رندا مسلماناں گوں عمرءَ بیعت كت و گوں آئیءَ دست إش دات.

فتوحات

حضرت عمرءَ ماں وتی خلافتءَ اسلامی حكومتی باز  دیما برت و دو مزنْ واكیں حكومت، إیران ورومی پروش دات، وپیغمبرءِ وعده په قیصر وكسریءِ گِرَگ، حضرت عمرءِ دستءَ ثابت بیت، وآئی اولی نفرے إنت كه بیت المقدسی چه مسیحیانی دستءَ بے جنگ وهون ریچیءَ پچ گپت.

حضرت عمرءِ دورءَ اسلامی حكومت روچ په روچ پراهْ گورتر بیت، وماں آ زمانءَ حضرت عمرءَ چه مدینهءَ، گوں وتی سیاست وتدبیرءَ إے مزنیں حكومتی اداره كت.

وفات

حضرت عمرءَ تا ده سال مسلمانانی خلافتءِ پست و منصب زینت دار كت، شپ و روچ په مسلمانانی خدمتءَ اوشتاتگ أت  ویك دمانے  چه آیانی خدمتءَ غافل نبیت.

آسرا  حضرت عمر فاروق، رند چه دراجیں عمرے خدمت په اسلام و مسلماناں ماں مدینه منورهءَ، ابولؤلؤ مجوسیءِ دستءَ شهید كنگ بوت، وماں وتی دو دوست ومحبوبءِ كرءَدفن كنگ بیت.

ندکار: زبیر حسین زهی

سرچمگ: اسلامءِ توار




بُن گپ: نبشتانك، 
ٹَـپـّه یاں : زندگی نامه حضرت عمر به زبان بلوچی، بلوچی نبشتانک، بلوچی سایت، بلوچی وبتاک،
دیم دیوک: muhammad askani
گڈسری نبشتانکاں
نبشتانکانی لڑ
همُک روچی لینک
دگه ساماں
من کلوبءِ تها

قالب وبلاگ