تبلیغات
چیهال - مولانا عبدالحمید: نادلگوشی په اصلاح وهدایتءَ، جامعه و چاگردءِ مرگءِ نشانی إنت
چیهال
سبزبات بلوچی باندا نه مروچی


مولانا عبدالحمید: نادلگوشی په اصلاح وهدایتءَ، جامعه و چاگردءِ مرگءِ نشانی إنت

زاهدانءِ اهلسنتءِ جمعهءِ پیشنمازءَ إے هپتگءِ جمعهءِ (4بهمن1392)ءِ گپاںگوں إے آیتءِ وانگءَ «وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِیَاء بَعْضٍ یَأْمُرُونَ بِالْمَعْرُوفِ وَیَنْهَوْنَ عَنِ الْمُنكَرِ وَیُقِیمُونَ الصَّلاَةَ وَیُؤْتُونَ الزَّكَاةَ وَیُطِیعُونَ اللّهَ وَرَسُولَهُ أُوْلَئِكَ سَیَرْحَمُهُمُ اللّهُ إِنَّ اللّهَ عَزِیزٌ حَكِیمٌ»[توبه: 71] بنگیج كت وپرمائینتی: دین مبین اسلامءَ هریكے چه اسلامی چاگردءِ مردماں اولسرءَ په وتی اصلاح وتزكیه و رندءَ په إے دگه مردمانی اصلاح كنگءَ پرمان داتگ.

مولانا عبدالحمیدءَ پرمائینت: اسلام یك جهانی دینے هست إنت.اسلام په یك خاصیں ملك و قومےءَ نیاتكگ، بلكیں په جهانءِ سرجمیں مردماں آتكگ.رسول الله صلی الله علیه وسلم تا قیامتءَ خداءِ برحقیں پیغمبرإنت و پهكیں نبیاں آئیءِ امتی أنت.

واجهءَ دیمءَ په فكركنگ انسانی جامعهءِ اصلاحءِ بارهءَ تاكیدكت و پرمائینتی: گوں اپسوزیءَ مرچی هیال وفكراں، انسانانی هدایت واصلاحءِ‌بارهءَ محدودبوتگ أنت. مسلماناں په سوداگری و دنیایی نپ وسوتءَ، چین، جاپان، أمریكا وإے دگه ملكاں گولاینت بلے دین وآخرتءِ واستا چوشیں كارے نكن أنت. پمشا فساد وناشری وغفلت عام بوتگ وگناه ومعصیت روچ په روچءَ گیشتر بوان إنت. ماں جاورے كه ما مسلمانانءَ یك په یك وظیفه هست كه وتی جرند و لوگءِ مردم وسیادانی اصلاح و بچگءَ فكرے بزورإیں. مئی وظیفه إنت كه وهدے ما منكر و ردیں كارے دیت چه آئیءِ گورءَ په بے پرواهی و بے سدی مگوزإیں، بلكیں په وتی وسءَ آئیءَ اصلاح بكنیں و اگاں إشیءَ نتوانیں، گڑا په آ منكرءِ گاربوگءَ دعا بلوٹیں.

 زاهدانءِ اهلسنتءِ جمعهءِ پیشنمازءَ پرمائینت: گناه ومعاصی چوشكه زنا، دزی، ظلم و كشتار ماں مروچیگیں چاگردءَ سك بازإنت. آ كسانے كه گناه كن أنت ایوكءَ وتءَ زیان ندینت، بلكیں چاگردءِ پهكیں مردماں زیان دینت. هماوڑءَ كه قرانءِ وانگ و عبادت، اللهءِ‌رحمتانی إیرآیگءِ سوب بنت، منكرات وگناهاں هں اللهءِ هژم وغضبءَ پادكن أنت وچاگردءَ خراب كن أنت.

مولانا عبدالحمیدءَ پرمائینت: چاگردءِ اصلاح وهدایت كنگ تهنا علما وتبلیغیانی سرءَ نه إنت، بلكیں كماش وذمه داران و لوگءِ واجه په وتی وسءَ وظیفه إش هست كه جامعهءِ اصلاحءِ بارهءَ گامے بزورأنت. نادلگوشی په اصلاح وهدایتءَ، چاگردءِ مرگءِ نشانی إنت. گڑا منكرانی دیمءَ گرگ و په چاگردءِ اصلاحءَ فكرے زورگ سك لازم وهژدری إنت.

 زاهدانءِ اهلسنتءِ جمعهءِ پیشنمازءَ حضرت لقمانءِ سوج په وتی زهگءَ دیمءَ آرت و پرمائینتی: لقمان حكیم وتی چوكءَ سوج دات و پرمائینتی:«یَا بُنَیَّ لَا تُشْرِكْ بِاللَّهِ إِنَّ الشِّرْكَ لَظُلْمٌ عَظِیمٌ» لقمانءِ اولی سوج په وتی چوكءَ إیش أت كه گوں خدا دگه كسےءَ شریك مكنت، پچے كه هچ گناهے چه شركءَ مزنتر نه إنت.

واجهءَ "نمازءِ وانگ" و " امربه معروف ونهی چه منكر"ءَ یك دگه سوجے چه لقمانءِ سوجاں زانت و پرمائینتی: حضرت لقمان حكیمءَ وتی چوك گوشت: «یَا بُنَیَّ أَقِمِ الصَّلَاةَ وَأْمُرْ بِالْمَعْرُوفِ وَانْهَ عَنِ الْمُنكَرِ وَاصْبِرْ عَلَى مَا أَصَابَكَ إِنَّ ذَلِكَ مِنْ عَزْمِ الْأُمُورِ» لقمان رند چه توحید ونمازءَ وتی چوك په امر به معروف ونهی چه منكرءَ سوج دنت.

زاهدانءِ اهلسنتءِ جمعهءِ پیشنمازءَ ماں إے بهرءِ آسرءَ چه وتی گپاںگوں إے آیتءِ وانگءَ «وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِیَاء بَعْضٍ یَأْمُرُونَ بِالْمَعْرُوفِ وَیَنْهَوْنَ عَنِ الْمُنكَرِ وَیُقِیمُونَ الصَّلاَةَ وَیُؤْتُونَ الزَّكَاةَ وَیُطِیعُونَ اللّهَ وَرَسُولَهُ أُوْلَئِكَ سَیَرْحَمُهُمُ اللّهُ إِنَّ اللّهَ عَزِیزٌ حَكِیمٌ»[توبه: 71] په دلگوش كنگ په امربه معروف ونهی چه منكرءَ تاكید كت و إے كاری انسانانی دنیا وآخرتءِ كامیابی زانت.

مولانا عبدالحمیدءَ ماں دگه بهرے چه وتی گپاں په"آریل شارون"ءِ مرگءَ اشاره كت و آئیءَ "تاریخءِ ناشركار" نامی دات وآئیءِ سكراتءِ دراج كش بوگءَ په إے دگه زوران سر و ناشراں عبرتے زانت.

واجهءَ ماں وتی گپانی آسرءَ په تپاكیءِ هپتگءِ گوزگءَ اشاره كت و پرمائینتی: ماں إے گوستگیں روچاں بازیں محفلے په پیغمبرءِ سیرت و زندگیءِ چارگ و دلگوش كنگءَ برجم دارگ بوت. ما باید مدام مهترءِ سیرتءَ بوان إین وآئیءِ سنتاں وتی زندگیءِ توكا بیارإیں. مرچاں اسلامی امت بازیں أڑ و جنجالانی آماچ إنت وإشیءِ سوب دوربوگ چه قرآن وسنت إنت.اگاں اسلامی امت شریعتءِ كشكءِ سرءَ بیئیت و په قرآن و سنتءَ عمل بكنت گڑا نگبهت و كامیاب بیت.

بلوچی سنی آنلاین




بُن گپ: جمعهءِ وعظان، 
ٹَـپـّه یاں : شیخ الاسلام مولانا عبدالحمید، مسجدمکی، دارالعلوم زاهدان، سنی آنلاین بلوچی، سایت بلوچی، خطبه های جمعه، بیانات جمعه،
دیم دیوک: muhammad askani
گڈسری نبشتانکاں
نبشتانکانی لڑ
همُک روچی لینک
دگه ساماں
من کلوبءِ تها

قالب وبلاگ